Riegenreise

Mier hei üs am Samschtig, 6.45 im Oscht troffe und si mit em Zug nach Brig und witter Richtig Fiesch.
O we me ir 1. Klass reist isch me vo Zugpanne nid gfeit….
Mit em Bus nach Binn und denn mit em Alpin Taxi witter nach Brunnebiel.
De isch fertig g’reist gsi und mier hei müesse d‘Stöck usfahre und d’Wanderschueh guet binde. Uf em alte Säumer- und Schmuggler Wäg simer Richtig Binntal Hütte uf broche. Nach emene zwüsche Drink det heimer der letzscht Stutz ufe zum Albrun Pass (2409m) under d‘Füess gno.
Uf der andere Site simer über Schnee, Schtei, und Schutt nidsi zum Lago Pianboglia und nachhär e ewigi lengi am Stousee Lago di Dévero entlang abe nach Campriolo it‘s Rifugio La Baita (1670m) gwanderet.
Was mier nid hei chöne begrife, wieso dass der Aperol Spritz scho ustrunke isch gsi, obwohl mier grad ersch si a cho. Also heimer halt der Plan B füre gno und hei feine Wisse trunke!!
Nach eme sehr guete italiänische Büffet Znacht …………???
Am nächste Morge simer z’Fuess e gueti halb Stund zur Alpe Devero abe gloffe und hei der Pronto Bus bis nach Baceno gno.
Det isch als überraschig d’Wanderig dür Orridi di Uriezzo (i der Isziit entschtandeni Schlucht) abe zum Marmitte dei Giganti uf em Program gstande.
I der Pizzeria Campagna in Verampio si mer verwöhnt worde und nachhär mit em Comazzi Bus nach Domodossola a Bahnhof bracht worde.
Nach emene Abschluss Drink und emene Glässi simer wider per Zug ids Bärner Oberland bracht worde.
D‘organisatorinne si froh, dass z’Wätter het mitgmacht und fasch alles klappt het.
Mier heis guet ka mitenand und hoffentlich heit er no chli Muskelkater i de Bei und villi schöni Erinnerige im Chopf.